هاوسەرۆكانی یەكێتی بەڵێن دەدەن حزبەکەیان بگێڕنەوە بۆ سەردەمی زێڕینی مام جەلال

18/02/2020
فۆتۆ: 
دەنگوباس

هاوسەرۆكایەنی یەكێتیی لە یەكەم لێدوانیاندا جەخت دەكەنەوە لەوەی حزبەكەیان بگێڕنەوە بۆ سەردەمی زێڕینی مام جەلال سكرتێری كۆچكردووی یەكێتیی.

لە كۆبوونەوەی ئەمڕۆی ئەنجومەنی سەركردایەتی یەكێتیدا لاهور شێخ جەنگی و بافڵ تاڵەبانی وەك هاوسەرۆكی حزبەكە هەڵبژێردران.

لاهور شێخ جەنگی هاوسەرۆكی یەكێتی لە یەكەم لێدوانیدا لەبەردەم ئەنجومەنی سەركردایەتی حزبەكەیدا رایگەیاند هەڵبژاردنیان بۆ هاوسەرۆكایەتی شەرەفێكی گەورە و ئەركێكی قورسە و ئەركە قورسەكانیشیان لەمڕۆوە دەستپێدەكات.

روونیشیكردەوە كە ئەركی سەرەكییان "ئاششتكردنەوەی خەڵك دەبێت لەگەڵ یەكێتی" و گەڕاندنەوەی یەكێتی بۆ "خانووە قوڕەكان" وەك ئاماژەیەك بۆ گرنگیدان بە چینی هەژاران.

لاهور شێخ جەنگی راشیگەیاند لەگەڵ بافڵ تاڵەبانیدا سەربازێكی ون و دەبن و شەو و رۆژ دەخەنە سەریەك بۆ ئاسوودەكردنی روحی شەهیدان و دڵی كەسوكارەكانیان.

وتیشی: "بەڵێن بێت لە جێی متمانەی ئێوە بین".

لایخۆشیەوە بافڵ تاڵەبانی هاوسەرۆكی یەكێتی لە وتەیەكی كورتدا سوپاسی ئەندامانی سەركردایەتی حزبەكەی كرد و جەختیكردەوە كە ئەو متمانەیەی پێیان بەخشراوە لە دەست نادەن و وتیشی: "یەكێتی دەكەینەوە بە یەكێتییەكەی مام جەلال".