بەرپرسی لقی پارتی لە خانەقین: داعش بە ئاشكرا بازگە دادەنێت و خەڵك دەڕفێنێت

02/02/2020
فۆتۆ: 
دەنگوباس

بەرپرسی لقی پارتی دیموكراتی كوردستان لە خانەقین رایدەگەیەنێت كە تیرۆریستانی داعش بە ئاشكرا بازگە دادەنێن و تا ئێستا نۆ كەسیان لە ناوچەكەدا ڕفاندووە.

شێخ جەعفەر شێخ مستەفا بەرپرسی لقی 15ی پارتی لە لێدوانێكی بۆ ماڵپەڕی فەرمیی حزبەكەی رایگەیاند ماوەی دوو رۆژە داعش لە سنووری خانەقین و دوزخورماتوو بە ئاشكرا بازگە دادەنێن و خەڵكی مەدەنی دەڕفێنن، كە لە سنووری قەرەتەپە حەوت قوتابییان رفاند و لە سنووری دوزخورماتووش دوو كەسی دیكەیان رفاندووە و تەرمی یەكێك لە قوتابییەكانیش بە كوژراوی دۆزراوەتەوە.

وتیشی: "ئەمە مەترسیدارترین پیلانە داعش جێبەجێی دەكات، چونكە خەڵكی مەدەنی لە ڕێگەی دانانی بازگەوە دەڕفێنن و خەڵكیش بە جۆرێك ترساوە كە لە بازگەی فەرمییش ناوێرن بوەستن و هێزە عێراقییەكانیش لەو سنوورە بێدەسەڵاتن و ناتوانن هیچ بۆ ئەو خەڵكە بكەن".

بەرپرسەكەی پارتی ئەوەشی خستەڕوو كە ئەگەر دۆخەكە بەوشێوەیە بەردەوام بێت، داعش خەڵكی زیاتر دەڕفێنێت، چونكە تەنها لە دوو رۆژدا بەئاشكرا نۆ كەسیان ڕفاندووە.