پەرلەمانتاریێكی پێشووی یەكێتی داوای بەرپاركردنی "شۆڕش" دەكات لە دژی پارتی

02/02/2020
فۆتۆ: 
دەنگوباس

پەرلەمانتارێكی پێشووی یەكێتی وەڵامی پارتی و وتەبێژی حكومەتی هەرێم دەداتەوە سەبارەت بەو كێشەیەی بە هۆی گرێبەستێكی غازەوە دروست بووە و بە پێویستیشیدەزانێت "شۆڕشێك" لە دژی پارتی بەرپابكرێت.

زانا عەبدولڕەحمان پەرلەمانتاری پێشووی یەكێتی لە رێی هەژماری خۆی لە تۆڕی كۆمەڵایەتی فەیسبووك بابەتێكی دەربارەی ئەو كێشەیە نووسیوە كە بە هۆی گرێبەستیكی غاز لە كێڵگەی كۆرمۆر دروست بووە، ئەوەیش وایكردووە كە غاز نەگاتە هەولێر و دهۆك.

زانا عەبدولڕەحمان پێوایە كە پارتی لە رێی حكومەتی هەرێمەوە داهاتی سامانی سورشتی سنووری پارێزگای سلێمانی و گەرمیان بۆ هەولێر و دهۆك خەرج كردووە و ئێستاش "هەموو گرێبەستەكانی لە بازرگانەكانی ئەم زۆنە ستاندۆتەوە وبازرگانی لە هەولێر و دهۆكەوە هێناوە لە كێڵگە نەوتی و غازەیەكانی زۆنی سەوز گرێبەستیان بۆ ئەكات بۆئەوەی بازرگانەكانی سلێمانی بێ ئیرادە بكەن".  

هاوكات رەخنە لە ژمارەیەك سەركردەی یەكێتی و گۆڕانیش دەگرێت بەوەی هاوكاری پارتی بوون لە جێبەجێكردنی ئەو خواستەیدا، بۆیە دەستخۆشیش لە رووداوەكەی شەوی رابردوو دەكات كە تێیدا رێگەنەدرا غازی شل لە كێڵگەكەی چەمچەماڵەوە بۆ هەولێر ببرێت.

لەگەڵ ئەوەشدا زانا عەبدولڕەحمان نیگەرانە لەوەی ئەمجارەش  نوێنەرانی یەكێتی و گۆڕان لە حكومەت كە بە "تیمی زەلیل" ناویبردوون، "بە پاڕانەوە ئەمەش بۆ پارتی چارە ئەكەن و ئەم گرێبەستەش تەسلیمی پارتی دەكەن".

پەرلەمانتارەكەی پێشووی یەكێتی داواش دەكات ئەو دۆخە لە پارتی قبوڵ نەكرێت و دەڵێت: "هەموو شتێك و شورشێك هەر لە كۆمەڵێك گەنجەوە دەست پێدەكات". 

دەقی نووسینەكەی زانا عەبدولڕەحمان

باشە خۆ ئەڵێن ئەم زۆنە هیچی نیە

لە كوبۆنەوەی فراكسیون لەگەل مەكتەبی سیاسی لەكاتی رێگری لە د یوسف هەڤاڵێكی مەكتەب سیاسی پێ ووتین ئەگەر تێكی بدەین لەگەل پارتی ئەمرین لە برسا ئەم زۆنە هیچی نیە ئەی خێرە ئێستا غازی هەموو كوردستان لە چەمچەماڵە
یانی پارتی غازەكەشمان ئەفرۆشێت و پارەكەی ئەدەن بە جادەی 150 مەتری لە هەولێر دوایی دێن گاڵتە بە خەڵكی ئەم ناوچەیە ئەكەن
لە هەموو خۆشتر حكومەتی تازە هەموو گرێبەستەكانی لە بازرگانەكانی ئەم زۆنە ستاندۆتەوە وبازرگانی لە هەولێر و دهۆكەوە هێناوە لە كێڵگە نەوتی و غازەیەكانی زۆنی سەوز گرێبەستیان بۆ ئەكات بۆئەوەی بازرگانەكانی سلێمانی بێ ئیرادە بكەن هەر ئەوە ماوە هێزی زێرەڤانی بێنیت و بەناوی پاراستنی كێڵگەی نەوتی
هەموو سەروەت و سامانی ئەم زۆنە بەتاڵ ئەبرێت بە پشتیوانی هەندێك بەرپرسی یەكێتی و گۆران
شكور ئەمشەو هەندێك كوری ئازا پەیدابوون
لانیكەم رێگری ئەكەن لەوەی ئەو تاڵانیە راگرن
ئەمە سەرەتایەكە بۆ ئەوەی ستۆپ بە حكومەتی هەولێر بكەن
چونكە ئەم حكومەتە تەنها بۆ بێ ئیرادەكردن و شكاندنی سلێمانێ هاتووە
تیمی زەلیلی یەكێتی و گۆرانیش لەحكومەت بە هەموو هێزیان پشتیوانی ئەو هەوڵەی پارتی ئەكەن
بۆیە دڵنیام بە پارانەوە ئەمەش بۆ پارتی چارە ئەكەن و ئەم گرێبەستەش تەسليمی پارتی ئەكەن
بەڵام تاكەی ئەمە بەردەوام ئەبێت ؟
هەموو شتێك و شورشێك هەر لە كۆمەڵێك گەنجەوە دەست پێئەكات .